Kompania bullgare Sunterra ka nënshkruar marrëveshje me prodhuesin kinez të pajisjeve për energji diellore dhe erë, Sungrow, për instalimin e mbi 1 GWh sistemeve të ruajtjes së energjisë me bateri në tre nga parqet e saj më të mëdha fotovoltaike në Bullgari.
Këto sisteme do të përmirësojnë profilin e prodhimit të energjisë nga parqet diellore, duke mundësuar ruajtjen dhe transferimin e energjisë nga periudhat e prodhimit të lartë gjatë ditës drejt periudhave me konsum më të madh. Kjo do të ulë ndërprerjet në rrjetin elektrik, do të stabilizojë çmimet e energjisë për konsumatorët dhe do të rrisë sigurinë e sistemit energjetik në tërësi.
Marrëveshja me Sungrow përfaqëson fazën e dytë të planit të Sunterra për zgjerimin e kapaciteteve të ruajtjes së energjisë. Kryetari ekzekutiv i Sunterra, Emil Shopov, e cilësoi këtë bashkëpunim si një angazhim të rëndësishëm për të ardhmen energjetike të Bullgarisë.
Sunterra, e themeluar në vitin 2023 dhe me seli në Plovdiv, operon katër parqe fotovoltaike në Bullgari dhe fokusohet gjithashtu në zhvillimin e energjisë së erës dhe prodhimin e hidrogjenit.
