Serbia dhe Rumania pritet të nënshkruajnë një Memorandum Mirëkuptimi për ndërtimin e hidrocentralit me akumulim dhe pompim Derdap 3, përgjatë lumit Danub në kufirin mes dy vendeve.
Projekti konsiderohet strategjik për forcimin e sigurisë energjetike në rajon dhe për integrimin më të mirë të burimeve të ripërtëritshme në rrjetin elektrik.
Kapaciteti i planifikuar për Derdap 3 varion nga 1,800 deri në 2,400 megavatë, ndërsa ndërtimi mund të nisë në vitin 2031 dhe të përfundojë deri në vitin 2034. Vlera e investimit parashikohet të arrijë rreth 1.4 miliardë euro.
Autoritetet energjetike të të dy vendeve e shohin këtë hidrocentral si një kapacitet rezervë të rëndësishëm për balancimin e rrjetit, sidomos gjatë periudhave kur prodhimi nga burimet e ripërtëritshme është i paqëndrueshëm.
Megjithatë, pala rumune ka theksuar se nuk do të lejojë që ndërtimi i Derdap 3 të ndikojë negativisht në prodhimin ekzistues të hidrocentraleve të tjera përgjatë Danubit.
Projekti shihet si një shembull i bashkëpunimit rajonal në sektorin e energjisë, që mund të kontribuojë ndjeshëm në stabilitetin dhe qëndrueshmërinë energjetike të Ballkanit.
