Zagrebacki Holding, ndërmarrja më e madhe komunale në Kroaci, ka paraqitur kërkesë për miratimin e një kredie deri në 56 milionë euro nga Korporata Ndërkombëtare Financiare (IFC), pjesë e Grupit të Bankës Botërore. Kjo kredi është konceptuar si financim “i gjelbër”, me qëllim mbështetjen e projekteve që reduktojnë ndikimin mjedisor dhe rrisin efikasitetin energjetik të shërbimeve publike në kryeqytetin kroat.
Sipas dokumenteve të paraqitura, fondet do të përdoren për modernizimin më të madh të deritanishëm të flotës së kompanisë, duke përfshirë blerjen e mjeteve, makinerive dhe pajisjeve të reja për sektorët e menaxhimit të mbeturinave, mirëmbajtjes së rrugëve dhe administrimit të hapësirave të gjelbra. Investimi synon zëvendësimin e qindra mjeteve të vjetruara me pajisje më efikase dhe më pak ndotëse.
Drejtuesit e Zagrebački Holding theksojnë se pas stabilizimit financiar të kompanisë dhe uljes së borxheve, kjo kredi përbën një hap të rëndësishëm drejt modernizimit të shërbimeve publike dhe përmbushjes së standardeve mjedisore europiane. Projekti pritet të përmirësojë cilësinë e shërbimeve komunale në qytet ndërkohë që redukton emetimet dhe kostot operative.
Ky zhvillim shkon në linjë me tendencën rajonale për financime të gjelbra dhe modernizim të infrastrukturës komunale, duke reflektuar rritjen e kërkesës për projekte të qëndrueshme dhe energjetikisht efikase në Evropën Juglindore.
