Prodhimi i energjisë elektrike nga burime të ripërtëritshme në Maqedoninë e Veriut ka shënuar rritje të ndjeshme gjatë muajit dhjetor 2025.
Sipas të dhënave zyrtare të operatorit të tregut të energjisë, Maqedonia e Veriut ka prodhuar gjithsej 51.980 MWh energji nga burime të ripërtëritshme, që përfaqëson një rritje prej rreth 27 për qind krahasuar me të njëjtin muaj të vitit të kaluar.
Gjatë këtij muaji, në treg kanë qenë aktivë 178 prodhues të energjisë nga burime të ripërtëritshme, një më shumë se në dhjetor të vitit paraprak. Kontributin kryesor në prodhim e kanë dhënë hidrocentralet, të cilat kanë prodhuar rreth 30.876 MWh energji elektrike. Ferma eolike kanë kontribuar me rreth 17.276 MWh, ndërsa impiantet fotovoltaike kanë prodhuar rreth 717 MWh. Nga ana tjetër, impiantet e biogazit dhe biomasës kanë siguruar gjithsej rreth 3.111 MWh energji.
Pjesëmarrja e energjisë nga burime të ripërtëritshme në prodhimin total të energjisë elektrike gjatë dhjetorit ka arritur në rreth 8.3 për qind, duke reflektuar një rol gjithnjë e më të rëndësishëm të këtij sektori në bilancin energjetik të vendit.
