Dronët ukrainas kanë goditur gjatë natës disa objekte strategjike energjetike dhe industriale në territorin rus, duke shkaktuar zjarre dhe ndërprerje të prodhimit në disa zona kyçe.
Presidenti ukrainas Volodymyr Zelensky konfirmoi se Shërbimi i Sigurisë së Ukrainës (SBU) kreu një sulm ndaj fabrikës kimike “Metafrax Chemicals” në rajonin e Permit, rreth 1,700 kilometra larg kufirit me Ukrainën. Sipas tij, kjo fabrikë furnizon industrinë ushtarake ruse me materiale të rëndësishme për prodhimin e dronëve, motorëve raketorë dhe eksplozivëve.
“Ky ishte një goditje ndaj një prej hallkave kryesore të kompleksit ushtarako-industrial rus”, deklaroi Zelensky, duke shtuar se prodhimi në uzinë është ndërprerë pas sulmit.
Autoritetet ruse raportuan se mbrojtja ajrore arriti të rrëzojë disa prej dronëve, ndërsa guvernatori i rajonit të Permit, Dmitry Mahonin, tha se nuk pati viktima.
Ndërkohë, një tjetër sulm ukrainas në qytetin portual të Novorossiysk shkaktoi zjarr në terminalin e madh të naftës “Grushovaya”, pjesë e kompleksit të njohur “Shesharis”, një nyje e rëndësishme për eksportin e naftës ruse. Autoritetet lokale konfirmuan se disa ndërtesa teknike u përfshinë nga flakët dhe dy persona mbetën të plagosur.
Terminali menaxhohet nga kompania shtetërore ruse Transneft dhe konsiderohet një nga objektet më të rëndësishme të transportit të naftës në rajon.
Ukraina ka shtuar muajt e fundit sulmet ndaj rafinerive, depove të karburantit dhe objekteve industriale në Rusi, duke argumentuar se infrastruktura energjetike është pjesë e drejtpërdrejtë e makinerisë ushtarake ruse.
Zelensky bëri të ditur gjithashtu se forcat ukrainase kanë goditur më 21 maj edhe një rafineri nafte në qytetin Sizran, në rajonin e Samarës, duke e cilësuar operacionin si pjesë të strategjisë afatgjatë për dobësimin e industrisë ruse të rafinimit të naftës.
