Kompania energjetike kanadeze Fortis Energy ka njoftuar përparimin e projektit të saj eolik Dobra Voda në Serbi, me kapacitet të instaluar prej 194 megavatësh (MW). Projekti është planifikuar të ndërtohet në rajonin e Veliko Gradiste, ndërsa faza e ndërtimit parashikohet të nisë në vitin 2027.
Parku i ri me erë do të përfshijë 29 turbina, secila me kapacitet prej rreth 6,7 MW, dhe pritet të prodhojë energji të mjaftueshme për furnizimin e më shumë se 150,000 familjeve. Investimi vlerësohet të arrijë në mbi 180 milionë euro, duke e renditur ndër projektet më të mëdha të energjisë së ripërtëritshme në Serbi.
Fortis ka theksuar se është duke punuar në përfundimin e studimeve mjedisore dhe teknike, ndërkohë që procesi i marrjes së lejeve pritet të përfundojë në vitin 2026. Sipas planit, projekti do të kontribuojë ndjeshëm në arritjen e objektivave të Serbisë për rritjen e pjesëmarrjes së burimeve të ripërtëritshme në miksin energjetik kombëtar.
Aktualisht, Serbia ka mbi 500 MW kapacitete të instaluara nga era, ndërsa projekte të tjera në zhvillim pritet ta trefishojnë këtë shifër në vitet e ardhshme.
Ndryshe, pak kohë më parë Fortis ka paralajmëruar se do të investojë edhe në Shqipëri, ku Këshilli i Ministrave ka miratuar ndërtimin e një projekti solar në Kolonjë, i cili gjithashtu shihet si një hap i rëndësishëm për rritjen e kapaciteteve të energjisë së ripërtëritshme në rajon.
