Në kuadër të konventës ndërkombëtare PDAC 2026 në Toronto të Kanadasë, zëvendësministri Getoar Mjeku prezantoi planet e Kosovës për hulumtim dhe investime në shfrytëzimin e burimeve natyrore.
“Në konventën PDAC në Toronto të Kanadasë, fola për planet tona për hulumtim dhe investime në shfrytëzimin e burimeve natyrore të Republikës së Kosovës,” shkroi Mjeku, përcjell Energy Monitor.
Ai theksoi se prania në këtë konventë, e cila konsiderohet ngjarja më e madhe në botë për industrinë minerare, është pjesë e përpjekjeve për reformimin dhe zhvillimin e sektorit minerar në Kosovë, njofton Energy Monitor.
“Prania në këtë konventë, që është ngjarja më e madhe për minierat në botë, është pjesë e përpjekjeve për me reformu dhe zhvillu sektorin minerar në Kosovë,” theksoi ai.
Sipas tij, pjesëmarrja e delegacionit të Kosovës po mbështetet nga Programi për Zhvillimin e së Drejtës Komerciale (CLDP) i Departamentit të Tregtisë së Shteteve të Bashkuara të Amerikës, duke synuar forcimin e reformave dhe tërheqjen e investimeve në sektorin minerar.
