Autoritetet ukrainase i thanë Reuters të hënën se energjia elektrike është rikthyer në ish-centralin bërthamor të Çernobilit në Ukrainë, pas një ndërprerjeje të shkaktuar nga bombardimet ruse pranë vendit një ditë më parë.
Një sulm me dron rus ndaj infrastrukturës elektrike shkaktoi një ndërprerje të energjisë elektrike për më shumë se tre orë dje, sipas Kievit, duke rrezikuar sigurinë e reaktorit të dëmtuar që përmban elementë shumë radioaktivë, i cili është i mbyllur hermetikisht me një kapak metalik.
Por nuk pati përhapje të radioaktivitetit në incident, thonë autoritetet ukrainase.
“Gjithçka po funksionon normalisht sot”, tha sot për AFP një zëdhënës i Ministrisë së Energjisë.
Centrali bërthamor i Çernobilit ndodhet në veri të Ukrainës, rreth 100 kilometra nga Kievi. Ishte vendi i aksidentit më të keq bërthamor në histori në vitin 1986, dhe reaktori i fundit u mbyll në vitin 2000.
Ushtria ruse e pushtoi centralin në fillim të pushtimit të Ukrainës në vitin 2022, vetëm për t’u tërhequr nga zona disa javë më vonë. Një tjetër central bërthamor ukrainas, centrali bërthamor Zaporizhia në jug të vendit të pushtuar nga Rusia, është bombarduar disa herë, pa përhapur radioaktivitet.
