Rumania po ndërmerr hapa për të ashpërsuar rregullat për lidhjen e projekteve energjetike në rrjetin elektrik, me qëllim frenimin e praktikave spekulative që po pengojnë realizimin e investimeve konkrete.
Kryeministri Ilie Bolojan ka deklaruar se një pjesë shumë e madhe e lejeve për lidhje në rrjet janë dhënë për projekte që nuk synojnë ndërtimin real të kapaciteteve energjetike, por më tepër rishitjen e këtyre lejeve për përfitim financiar. Sipas tij, kjo ka krijuar një bllokadë në rrjet, duke e bërë të vështirë për investitorët seriozë të sigurojnë kapacitetet e nevojshme, njofton Balkan Green Energy News.
Të dhënat tregojnë se deri në fund të vitit 2025 janë dhënë leje për kapacitete shumë të mëdha, ndërsa vetëm një pjesë e vogël e tyre është materializuar në projekte konkrete. Në këtë kontekst, autoriteti rregullator i energjisë në Rumani, ANRE, ka propozuar masa të reja që synojnë disiplinimin e tregut dhe përshpejtimin e realizimit të projekteve.
Këto masa përfshijnë vendosjen e afateve më të shkurtra për zhvillimin e projekteve, rritjen e kërkesave për garanci financiare nga ana e investitorëve, si dhe anulimin e lejeve në rast të mosrespektimit të kushteve të përcaktuara. Paralelisht, po shqyrtohet edhe mundësia e ndryshimit të mënyrës së ndarjes së kapaciteteve në rrjet, duke kaluar nga sistemi aktual “kush vjen i pari, shërbehet i pari” në një qasje më konkurruese, përmes ankandeve, përcjell Energy Monitor.
Megjithatë, përfaqësues të industrisë kanë shprehur shqetësimin se ndryshimet e propozuara mund të ndikojnë edhe në projektet serioze që janë tashmë në faza të avancuara zhvillimi, duke kërkuar një zbatim të kujdesshëm dhe të balancuar të reformave.
