Ish-drejtori i Zyrës së Prokurimit në Korporatën Energjetike të Kosovës (KEK), Ymer Dragusha, është dënuar me dy vjet burgim për keqpërdorim të detyrës zyrtare në rastin ku i akuzuar është edhe ish-kryeshefi i KEK-ut, Nagip Krasniqi.
Aktgjykimi ndaj Dragushës është shpallur të mërkurën, më 8 korrik, pasi ai ka arritur marrëveshje për pranimin e fajësisë me Prokurorinë dhe ka marrë statusin e dëshmitarit bashkëpunues në këtë rast.
Sipas aktakuzës, Dragusha, Krasniqi dhe Isuf Zejna, ky i fundit si përfaqësues i kompanisë “Rexhepi Zeqiri Zejna”, dyshohen se përmes veprimeve të tyre i kanë shkaktuar dëm buxhetit të Kosovës në vlerë prej rreth 37 milionë eurosh.
Prokuroria pretendon se të pandehurit kanë qenë të përfshirë në dhënien e disa tenderëve në mënyrë të kundërligjshme dhe në favorizimin e kompanive të caktuara. Sipas aktakuzës, këto veprime janë kryer me udhëzimet e Nagip Krasniqit.
Në kuadër të rastit janë përfshirë edhe procedura tenderuese me kompani të huaja, përfshirë kompani nga Greqia, për të cilat Prokuroria ka ngritur dyshime për parregullsi në procesin e përzgjedhjes.
Rasti ndaj ish-kryeshefit të KEK-ut, Nagip Krasniqi, dhe të akuzuarve të tjerë vazhdon të jetë në procedurë gjyqësore.
