Ekonomia e Eurozonës ka shënuar një rritje më të fortë se pritshmëritë gjatë tremujorit të dytë të vitit 2026, duke treguar qëndrueshmëri përballë krizës energjetike dhe pasigurive të shkaktuara nga konflikti në Lindjen e Mesme.
Sipas vlerësimeve paraprake të Eurostat, Prodhimi i Brendshëm Bruto (PBB) i 21 vendeve që përdorin euron u rrit me 0.4% në periudhën prill-qershor, pas një tremujori të parë pa rritje ekonomike.
Rezultati tejkaloi pritshmëritë e analistëve, të cilët, sipas një ankete të Bloomberg, parashikonin një zgjerim prej vetëm 0.2%.
Performanca pozitive u mbështet nga ekonomitë kryesore të bllokut. Gjermania dhe Franca regjistruan rritje prej 0.2%, ndërsa Spanja kryesoi me një zgjerim prej 0.7%, e favorizuar nga sezoni i fortë turistik. Edhe Italia shënoi një rritje modeste prej 0.2%.
Një ndikim të rëndësishëm në rezultatin e përgjithshëm pati Irlanda, ekonomia e së cilës u rrit me 3.9%, duke rikuperuar pas tkurrjes së ndjeshme të regjistruar në tremujorin e parë.
Të dhënat sugjerojnë se ekonomia e Eurozonës ka përballuar më mirë nga sa pritej rritjen e kostove të energjisë dhe pasojat ekonomike të konfliktit në Lindjen e Mesme. Ndërkohë, çmimi i naftës Brent është rikthyer mbi 92 dollarë për fuçi pas përshkallëzimit të tensioneve dhe ndërprerjes së armëpushimit.
Banka Qendrore Evropiane ka vendosur të mbajë të pandryshuara normat bazë të interesit në nivelin 2.25%, ndërsa vijon të monitorojë ndikimin e zhvillimeve gjeopolitike mbi inflacionin dhe aktivitetin ekonomik.
Sipas projeksioneve të BQE-së, ekonomia e Eurozonës pritet të rritet me 0.8% gjatë vitit 2026 dhe me 1.2% në vitin 2027. Megjithatë, perspektiva mbetet e brishtë për shkak të luhatjeve të çmimeve të energjisë, inflacionit që vijon të qëndrojë mbi objektivin 2% dhe pasigurive të lidhura me zhvillimet në Lindjen e Mesme.
