Kompania kroate Dalekovod ka siguruar një kontratë me vlerë mbi 300 milionë euro për ndërtimin e linjave të reja të transmetimit të energjisë elektrike në Suedi. Operatori suedez i sistemit të transmetimit, Svenska kraftnät, ka përzgjedhur ofertën e kompanisë për ndërtimin e dy linjave paralele 400 kV, në një projekt që synon të forcojë rrjetin elektrik të vendit.
Sipas njoftimit të Dalekovod-it, projekti përfshin një korridor prej 94 kilometrash ndërmjet nënstacioneve Mehedeby dhe Uppsala. Përveç dy linjave të reja 400 kV, punimet parashikojnë çmontimin e linjave ekzistuese 220 kV dhe ndërtimin e një linje të re 220 kV. Realizimi i projektit është planifikuar për periudhën 2027–2031.
Marrëveshja është një nga kontratat e mëdha të siguruara nga kompania kroate në tregun evropian të infrastrukturës energjetike. Dalekovod është e specializuar në projektimin, ndërtimin dhe pajisjet për linjat e transmetimit të energjisë elektrike, ndërsa projektet e këtij lloji kanë rol të rëndësishëm në rritjen e kapaciteteve të rrjeteve dhe përshtatjen e tyre me nevojat e reja të sistemit energjetik.
Kompania është gjithashtu e përfshirë në zhvillimin e infrastrukturës së transmetimit në rajonin e Ballkanit Perëndimor. Një konsorcium i udhëhequr nga Dalekovod ka marrë përsipër ndërtimin e një pjese të linjës 400 kV që lidh Manastirin, Ohrin dhe kufirin me Shqipërinë, projekt që synon të forcojë ndërlidhjen energjetike mes Maqedonisë së Veriut dhe Shqipërisë.
Punimet në pjesën e projektit në Maqedoninë e Veriut nisën në vitin 2026. Interkoneksioni është pjesë e përpjekjeve për të rritur kapacitetet e transmetimit dhe për të përmirësuar shkëmbimin ndërkufitar të energjisë elektrike në rajon.
