Evropa pritet të përballet me një muaj gusht më të nxehtë se mesatarja, me rrezik të shtuar për valë të reja të të nxehtit, zjarre dhe presion mbi sistemet energjetike. Parashikimet sezonale tregojnë se temperaturat mbi normalen do të prekin veçanërisht rajonin e Mesdheut dhe Evropën Juglindore, ndërsa shkencëtarët theksojnë se ndryshimet klimatike po i bëjnë këto episode gjithnjë e më të shpeshta dhe më intensive.
Evropa po hyn në muajin gusht me pritshmëri për temperatura më të larta se normalja, pas një vere të shënuar nga valë të njëpasnjëshme të të nxehtit që kanë sjellë temperatura mbi 40°C, zjarre të mëdha në Francë dhe Spanjë dhe evakuimin e mijëra banorëve.
Sipas Ioanna Vergini, themeluese e platformës së parashikimit të motit WFY24, përditësimet sezonale të publikuara në fillim të korrikut tregojnë se temperaturat mbi normalen do të dominojnë në pjesën më të madhe të kontinentit, me sinjalin më të fortë në rajonin e Mesdheut dhe Evropën Juglindore.
Në mesin e zonave më të ekspozuara përmenden Gadishulli Iberik, Italia, Greqia dhe pjesë të Ballkanit. Temperaturat e larta të Detit Mesdhe pritet të ndikojnë edhe në temperaturat gjatë natës, duke rritur numrin e të ashtuquajturave “netë tropikale”, kur temperaturat nuk bien nën 20°C, përcjell Energy Monitor.
Parashikimet tregojnë se qytete si Napoli, Barcelona, Roma, Valencia, Nica, Selaniku, Spliti dhe Athina mund të regjistrojnë netë tropikale gjatë ditëve të para të gushtit. Edhe në Mbretërinë e Bashkuar, Met Office parashikon temperatura deri në 35°C dhe periudha të reja me mot shumë të nxehtë.
Shkencëtarët theksojnë se ndryshimet klimatike janë faktori kryesor që po rrit frekuencën dhe intensitetin e valëve të të nxehtit. Analizat e World Weather Attribution kanë treguar se vala e nxehtësisë që goditi Evropën në fund të qershorit do të kishte qenë pothuajse e pamundur të ndodhte në këtë periudhë të vitit pesë dekada më parë, ndërsa temperaturat ishin rreth 3.5°C më të ulëta në krahasim me ato të regjistruara këtë vit.
Sipas studiuesve, emetimet nga djegia e qymyrit, naftës dhe gazit natyror vazhdojnë të jenë shkaku kryesor i ngrohjes globale, e cila po krijon kushte për valë gjithnjë e më ekstreme të të nxehtit.
Një rol të rëndësishëm luajnë edhe fenomenet atmosferike si “kupolat e nxehtësisë”, sisteme të fuqishme me presion të lartë që bllokojnë ajrin e nxehtë mbi një rajon për disa ditë ose javë. Megjithatë, studimet tregojnë se edhe këto modele atmosferike janë bërë dukshëm më të shpeshta për shkak të ndryshimeve klimatike.
Fenomeni natyror El Niño mund të ndikojë gjithashtu në temperaturat globale, por ekspertët theksojnë se efekti i tij është shumë më i vogël se ai i ngrohjes së shkaktuar nga aktiviteti njerëzor. Ndërkohë, pretendimet se reduktimi i ndotjes së ajrit është shkaku kryesor i valëve të fundit të të nxehtit janë hedhur poshtë nga klimatologët, të cilët vlerësojnë se rritja e gazrave serrë mbetet faktori dominues.
Për sektorin energjetik, temperaturat e larta nënkuptojnë rritje të kërkesës për energji elektrike për ftohje, presion më të madh mbi rrjetet elektroenergjetike dhe rrezik më të lartë për ndërprerje gjatë periudhave me konsum maksimal. Në të njëjtën kohë, thatësirat dhe zjarret mund të ndikojnë negativisht në prodhimin hidroenergjetik dhe në funksionimin e infrastrukturës energjetike në disa vende evropiane.
