Maqedonia e Veriut ka shënuar përparim të rëndësishëm në tranzicionin energjetik, por hapi i radhës duhet të jetë modernizimi i sistemit energjetik dhe rrjetit elektrik. Kështu u shpreh Bjorn Gabriel, drejtues i Zyrës së Bankës Evropiane të Investimeve (BEI) në Maqedoninë e Veriut, në një intervistë për MIA.
Sipas tij, kapacitetet e instaluara nga burimet e ripërtëritshme tashmë përbëjnë mbi 50% të kapacitetit total të instaluar në vend, ndërsa rreth një e treta e prodhimit të energjisë elektrike vjen nga këto burime. Ai vlerësoi gjithashtu përparimin në përafrimin e legjislacionit me standardet e Bashkimit Evropian dhe krijimin e Ministrisë së Energjetikës në vitin 2024, përcjell Energy Monitor.
Gabriel theksoi se prioritetet tani janë zgjerimi dhe modernizimi i rrjetit elektrik, forcimi i interkoneksioneve dhe integrimi më i madh në tregun rajonal të energjisë, në mënyrë që sistemi të mund të përballojë një pjesë më të madhe të prodhimit nga energjia diellore dhe e erës.
Ai shtoi se zhvillimi i sistemeve të ruajtjes së energjisë me bateri (BESS) do të jetë thelbësor për rritjen e fleksibilitetit të sistemit dhe garantimin e sigurisë energjetike, ndërsa Ballkani Perëndimor duhet të përshpejtojë investimet për të reduktuar varësinë nga karburantet fosile dhe për të avancuar tranzicionin e gjelbër.
