Maqedonia e Veriut dhe Serbia kanë bërë një hap të rëndësishëm drejt krijimit të një korridori të ri rajonal të gazit, me nënshkrimin e marrëveshjes për projektimin dhe ndërtimin e interkonektorit të gazit mes dy vendeve.
Marrëveshja u nënshkrua nga drejtori i operatorit të sistemit të transmetimit të gazit në Maqedoninë e Veriut, NOMAGAS, dhe përfaqësuesi i kompanisë ndërtuese Rapid Bild, e cila është përzgjedhur si kontraktore për projektin. Në ceremoninë e nënshkrimit morën pjesë edhe kryeministri i Maqedonisë së Veriut, Hristijan Mickoski, dhe ministrja e Energjisë, Minierave dhe Burimeve Minerale, Sanja Bozhinovska, përcjell Energy Monitor.
Interkonektori do të ketë një gjatësi totale prej rreth 70 kilometrash, duke lidhur sistemet e transmetimit të gazit të Maqedonisë së Veriut dhe Serbisë. Rreth 22.4 kilometra të linjës do të ndërtohen në territorin e Maqedonisë së Veriut, ndërsa pjesa tjetër do të shtrihet në territorin serb.
Segmenti në Maqedoninë e Veriut kushton 29.4 milionë euro
Sipas të dhënave të prezantuara në ceremoninë e nënshkrimit, segmenti në territorin e Maqedonisë së Veriut do të kushtojë rreth 29.4 milionë euro.
Tubacioni do të ketë diametër prej 500 milimetrash dhe do të nisë pranë stacionit të bllokimit në Kleçevc, duke përfunduar në kufirin me Serbinë, pranë fshatit Sopot, njofton Energy Monitor.
Projekti përfshin edhe ndërtimin e disa objekteve përcjellëse, përfshirë një stacion kryesor matës, një stacion reduktues, një stacion bllokues dhe dy stacione për pranimin dhe dërgimin e pajisjeve për pastrimin e tubacionit. Kapaciteti teknik i parashikuar është deri në 160 mijë metra kub gaz në orë.
Përfundimi i të gjithë projektit është planifikuar deri në fund të vitit 2028, sipas autoriteteve të Maqedonisë së Veriut.
Pjesë e një korridori më të gjerë energjetik
Rëndësia e projektit shkon përtej lidhjes direkte mes dy vendeve. Interkonektori me Serbinë po zhvillohet paralelisht me interkonektorin e gazit mes Maqedonisë së Veriut dhe Greqisë, duke krijuar potencialisht një korridor të ri të gazit nga jugu drejt veriut.
Interkonektori Greqi–Maqedoni e Veriut është tashmë në ndërtim dhe synon ta lidhë sistemin maqedonas me infrastrukturën greke të gazit. Kjo do t’i japë Maqedonisë së Veriut qasje në burime dhe rrugë të reja furnizimi, përfshirë infrastrukturën e gazit në Greqi.
Me përfundimin e të dy projekteve, Shkupi synon të krijojë një lidhje më të drejtpërdrejtë veri–jug, duke e pozicionuar vendin si një nyje të rëndësishme të rrjetit rajonal të gazit.
Kryeministri Hristijan Mickoski e ka cilësuar këtë zhvillim si krijimin e një lidhjeje vertikale energjetike, e cila do të forcojë pozitën strategjike të Maqedonisë së Veriut në rajon, përcjell Energy Monitor.
Nga Greqia drejt Serbisë
Nëse të dy interkonektorët përfundojnë sipas planeve, rrjeti do të mundësojë një rrugë të re për transportin e gazit nga Greqia përmes Maqedonisë së Veriut drejt Serbisë.
Kjo ka rëndësi edhe për diversifikimin e furnizimit në Ballkanin Perëndimor, pasi krijon mundësi për përdorimin e burimeve alternative të gazit dhe lidhje më të forta me tregjet evropiane të energjisë. Ministrja Bozhinovska e ka lidhur projektin me rritjen e sigurisë së furnizimit dhe integrimin më të madh të Maqedonisë së Veriut në tregjet rajonale të gazit.
Për Kosovën, zhvillimi është veçanërisht relevant në aspektin rajonal. Një korridor i konsoliduar Greqi–Maqedoni e Veriut–Serbi do të ndryshonte arkitekturën e infrastrukturës së gazit në afërsi të Kosovës dhe do të krijonte një tjetër zhvillim të rëndësishëm energjetik në rajon.
