Italia po mbetet prapa objektivave evropiane për tranzicionin energjetik, duke përmbushur deri tani vetëm 15% të synimeve që duhet të arrijë deri në vitin 2030. Të dhënat vijnë nga raporti vjetor i organizatës së studimeve klimatike ECCO, i publikuar të hënën.
Sipas raportit, vendi ka shënuar përparim në energjinë e ripërtëritshme, por ritmi mbetet i pamjaftueshëm. Gjatë vitit të kaluar, Italia instaloi rreth 7 gigavat kapacitete të reja, ndërsa për të përmbushur objektivat e vitit 2030 nevojiten rreth 10 gigavat çdo vit.
Zgjerimi i energjisë së pastër pengohet nga procedurat e ngadalta të miratimit dhe vonesat në lidhjen me rrjetin elektrik. Ndërkohë, emetimet e gazeve serrë në vitin 2025 u rritën me rreth 9 milionë tonë ekuivalent CO₂ krahasuar me një vit më parë.
Për të arritur objektivat evropiane të klimës dhe energjisë, Italia duhet të ulë emetimet me rreth 95 milionë tonë ekuivalent CO₂ nga nivelet e vitit 2025, një reduktim që përfaqëson afërsisht 25% të emetimeve kombëtare.
Vështirësi ka edhe në sektorin e transportit. Italia kishte rreth 445 mijë makina elektrike në qarkullim vitin e kaluar, shumë larg objektivit prej 4.3 milionësh deri në vitin 2030.
Raporti evidenton gjithashtu vonesa në objektivat e tranzicionit të gjelbër për ndërtesat, industrinë, largimin gradual nga gazi dhe elektrifikimin e konsumit të energjisë.
Sipas ECCO-s, përparimi është pozitiv, por jo i mjaftueshëm. Me vetëm katër vjet të mbetura deri në afatin e vendosur, Italia përballet me sfidën e përshpejtimit të investimeve dhe reformave për të përmbushur angazhimet klimatike.
/scantv.al
