NASA po përshpejton planet për të ndërtuar një reaktor bërthamor në sipërfaqen e hënës, me synimin që brenda vitit 2030 të sigurojë një burim energjie të qëndrueshëm dhe të pavarur për misionet hapësinore.
Drejtuesi në detyrë i agjencisë, Sean Duffy, njoftoi se NASA po kërkon propozime nga industria për një sistem energjie me kapacitet të paktën 100 kilovat, që do të mundësojë operacione të vazhdueshme edhe gjatë netëve të gjata hënore, që zgjasin deri në dy javë.
Ky projekt është pjesë e një gare më të gjerë hapësinore me Kinën dhe Rusinë, të cilat gjithashtu planifikojnë ndërtimin e një baze të përbashkët hënore me një reaktor energjie brenda mesit të viteve 2030. Energjia e qëndrueshme do të jetë kyçe për funksionimin e stacioneve dhe për jetesën e sigurt të astronautëve, veçanërisht në zonat strategjike të Hënës, si poli jugor, ku ka burime uji në formën e akullit dhe dritë diellore të vazhdueshme.
Në vitet e fundit, NASA ka zhvilluar një sistem pilot me kapacitet 40 kilovat, por kërkesa aktuale është për një sistem më të fuqishëm dhe me kohë më të shkurtër realizimi. Projekti do të realizohet në bashkëpunim të ngushtë me sektorin privat, me emërimin e një drejtuesi ekzekutiv brenda një muaji dhe nisjen e thirrjeve për propozime në 60 ditët në vijim.
Ndërtimi i këtij reaktori ka edhe një rëndësi strategjike të madhe, pasi parashikohet krijimi i një zone ekskluzive rreth bazës, që do të kufizojë hyrjet e vendeve të tjera në territoret kyçe të sipërfaqes së Hënës. Kjo do t’i japë Shteteve të Bashkuara një avantazh të rëndësishëm në kuadër të programit Artemis për eksplorimin e hapësirës.
Megjithë sfidat dhe kufizimet buxhetore, ky projekt mbetet ndër më të rëndësishmit për vendosjen e një pranie të qëndrueshme amerikane në hapësirë, duke hapur rrugën për eksplorime të mëtejshme drejt Marsit dhe më tej në dekadat e ardhshme.
