Drejtori i Përgjithshëm i Policisë së Kosovës, Gazmend Hoxha, ka zhvilluar një takim zyrtar me përfaqësues të Fondit të Kosovës për Efiçiencën e Energjisë (FKEE).
Qëllimi i takimit ishte shqyrtimi i mundësive për bashkëpunim në projekte të përbashkëta që synojnë përmirësimin e efiçiencës së energjisë në objektet e Policisë së Kosovës.
Në përputhje me objektivat e saj strategjike, Policia e Kosovës ka planifikuar avancimin dhe menaxhimin efikas të shërbimeve mbështetëse, si dhe përmirësimin e performancës energjetike përmes investimeve dhe përkrahjes nga institucionet përkatëse.
Përfaqësuesit e FKEE-së theksuan rëndësinë e bashkëpunimit ndërinstitucional, duke vlerësuar se “bashkëpunimi ndërinstitucional është kyç për zhvillim të qëndrueshëm”.
