Operatori kroat i naftës, Janaf, njoftoi të enjten se nuk do të jetë më në gjendje të përmbushë kontratën e furnizimit me naftë me kompaninë serbe NIS, pasi sanksionet e Shteteve të Bashkuara kundër NIS-it hynë në fuqi më 8 tetor.
Në një deklaratë për shtyp, Janaf theksoi se po punon “aktivisht, në bashkëpunim me qeverinë kroate dhe këshilltarë juridikë amerikanë”, për të gjetur zgjidhje që përputhen me legjislacionin ndërkombëtar.
Më parë, zyra amerikane për kontrollin e pasurive të huaja (Office of Foreign Assets Control, OFAC) kishte lëshuar një licencë që lejonte Janaf-in të vazhdonte furnizimin deri më 15 tetor. Por NIS deklaroi se nuk arriti të siguronte një shtyrje të mëtejshme për të shmangur bllokimin e sanksioneve.
Kontrata midis Janaf dhe NIS përfshinte transportin e 10 milionë ton naftë gjatë periudhës 1 janar 2024 – 31 dhjetor 2026. Sipas Janaf-it, zbatimi i mëtejshëm i kësaj kontrate bëhet i pamundur që nga data 8 tetor.
Sanksionet amerikane kundër NIS-it u shpallën në janar, për shkak të pronësisë së kompanisë nga struktura ruse. Zbatimi i tyre është shtyrë disa herë që prej kësaj kohe.
NIS është kompani pjesërisht në pronësi të Gazprom Neft (44.85 %), ndërsa qeveria e Serbisë zotëron rreth 29.87 %. Kompania menaxhon rafinerinë e vetëm të Serbisë në Pançevo me kapacitet vjetor prej 4.8 milionë ton.
Në përgjigje të situatës, NIS tha se ka rezervë të mjaftueshme nafte për operacionet aktuale dhe po vazhdon furnizimin normal të stacioneve të karburantit, megjithëse nuk zbuloi se sa rezervë ka ose sa do të zgjasë kjo situatë.
