Kryesuesi i Bordit të Drejtorëve të KOSTT, Dr. Gëzim Tosuni, së bashku me U.D. Kryeshefin Ekzekutiv, z. Shaban Neziri, priti në takim Kryetarin e Komunës së Gjilanit, z. Alban Hyseni.
Takimi u zhvillua në kuadër të bashkëpunimit institucional ndërmjet KOSTT dhe Komunës së Gjilanit, me fokus zhvillimet në sektorin e energjisë dhe planifikimet për fuqizimin e rrjetit të transmetimit në këtë zonë. Në këtë kontekst, u diskutuan nevojat dhe kapacitetet e ardhshme të rrjetit për mbështetjen e zhvillimit ekonomik të zonës, integrimin e burimeve të ripërtëritshme të energjisë, si dhe adresimin e kërkesave të reja për furnizim me energji elektrike, përfshirë edhe Projektin e Parkut të Biznesit në Gjilan, i planifikuar si zonë ekonomike me rëndësi për rajonin.
KOSTT mbetet i përkushtuar për forcimin e bashkëpunimit me komunat dhe institucionet relevante, në funksion të planifikimit të koordinuar, modernizimit të infrastrukturës energjetike dhe rritjes së sigurisë së furnizimit me energji elektrike.
