Serbia dhe Azerbajxhani pritet të arrijnë një marrëveshje për ndërtimin e një centrali me gaz gjatë muajit maj, duke shënuar një hap të rëndësishëm në bashkëpunimin energjetik mes dy vendeve.
Projekti parashikon ndërtimin e një centrali të kombinuar me kapacitet rreth 500 MW energji elektrike dhe rreth 150 MW energji termike, ndërsa realizimi i tij do të bëhet përmes krijimit të një ndërmarrjeje të përbashkët mes kompanive shtetërore serbe dhe SOCAR.
Kontrata pritet të përcaktojë rolet dhe përgjegjësitë e aktorëve kryesorë, përfshirë Elektroprivreda Srbije dhe Srbijagas, ndërsa negociatat për kushtet teknike dhe komerciale janë në fazë të avancuar dhe synohet të përmbyllen në fillim të majit, përcjell Energy Monitor.
Centrali pritet të ndërtohet pranë qytetit të Nishit dhe të hyjë në operim rreth vitit 2030, në varësi të fizibilitetit ekonomik të investimit. Për funksionimin e tij do të nevojiten rreth 600 milionë metra kub gaz në vit, duke u mbështetur kryesisht në furnizimet nga Azerbajxhani.
Ky projekt është pjesë e strategjisë së Serbisë për të diversifikuar burimet e energjisë dhe për të reduktuar varësinë nga gazi rus, ndërsa njëkohësisht synon të forcojë sigurinë energjetike dhe të rrisë kapacitetet prodhuese në vend.
