Për herë të parë në historinë e Bashkimit Evropian, energjia nga dielli është bërë burimi kryesor i prodhimit të energjisë elektrike. Gjatë muajit qershor, panelet diellore prodhuan më shumë energji sesa centralet bërthamore, duke shënuar një moment të rëndësishëm në tranzicionin drejt burimeve të ripërtëritshme.
Të dhënat e publikuara nga organizata analitike “Ember” tregojnë se energjia diellore zuri 22.1% të totalit të prodhimit të energjisë elektrike në BE, ndërsa energjia bërthamore ra në 21.8%. Gjermania, Spanja, Holanda, Greqia dhe Bullgaria ishin ndër vendet që shënuan rekorde të reja në prodhimin diellor.
Rritja vjen si rezultat i instalimeve të reja, kushteve të favorshme të motit dhe mbështetjes politike për energjinë e pastër. Në të njëjtën kohë, prodhimi nga qymyri ra në nivelin më të ulët historik – vetëm 6.1% e miksit energjetik.
Megjithatë, Ember paralajmëron se sistemi energjetik evropian ka ende nevojë për përmirësime. Gjatë valëve të nxehtësisë në fund të qershorit, kërkesa për energji u rrit me mbi 14%, duke rritur presionin mbi rrjetet dhe çmimet. Ekspertët kërkojnë më shumë investime në bateri ruajtëse dhe rrjete fleksibël për të garantuar furnizim të qëndrueshëm edhe pas perëndimit të diellit.
Rritja e energjisë diellore konsiderohet një hap i madh përpara, por mbetet sfida e balancimit të sistemit në periudhat pa prodhim nga dielli apo era.
