Korniza e BE-së për Investimeve në Ballkanin Perëndimor (WBIF) po i shndërron investimet në rezultate reale për qytetarët e Kosovës.
Si partneri më i fortë dhe ofruesi më i madh i ndihmës financiare, BE-ja i ka dhënë pothuajse 300 milionë euro Kosovës vetëm në grante nga WBIF, duke u siguruar 550,000 qytetarëve qasje në ujë të pijshëm të sigurt, duke rehabilituar ngrohjen qendrore për 13,500 qytetarë në Prishtinë dhe duke ofruar 19 MW kapacitet gjenerimi të energjisë së ripërtëritshme dhe 169 ndërtesa publike me efikasitet energjetik.
Hubert Perr, shefi i Sektorit të Bashkëpunimit të BE-së në Kosovë, iu bashkua të martën përfaqësuesve të qeverisë, institucioneve financiare dhe ekspertëve në tryezën e rrumbullakët të Institutit Riinvest për të diskutuar WBIF dhe mbështetjen e tij të mëtejshme për të ardhmen evropiane të Kosovës, përcjell Energy Monitor.
Tryeza e rrumbullakët, e mbështetur nga projekti “Përgjigje Politike” i financuar nga BE-ja në kuadër të programit Horizon Europe, shërbeu për të forcuar koordinimin në përgatitjen e projekteve dhe për të shfrytëzuar më mirë Planin e Rritjes së BE-së për një ndikim më të madh.
Në takim u tha se diskutimet do të formësojnë rekomandimet e politikave për të rritur angazhimin e Kosovës me WBIF.
