Kompania zhvilluese dhe prodhuese e pavarur e energjisë Renalfa IPP ka filluar instalimin e një sistemi të ruajtjes së energjisë përmes baterive (BESS) me kapacitet 200 MWh, i integruar në një impiant fotovoltaik në Maqedoninë e Veriut.
Projekti po zhvillohet në kompleksin energjetik të Oslomejit, në një zonë ish-industriale të minierave të linjitit, dhe përfaqëson një nga investimet më të avancuara në rajon, duke kombinuar prodhimin nga dielli me ruajtjen e energjisë përmes baterive.
Sipas njoftimit, sistemi i baterisë (BESS) është dizajnuar për të rritur fleksibilitetin e prodhimit, për të optimizuar përdorimin e energjisë solare dhe për të mbështetur stabilitetin e rrjetit elektrik, duke mundësuar zhvendosjen e energjisë së prodhuar gjatë orëve me rrezatim maksimal drejt periudhave me kërkesë më të lartë.
Projekti në Oslomej bazohet në një central solar me kapacitet rreth 50 MW dhe është pjesë e transformimit të vazhdueshëm të kësaj zone nga një hapësirë e minierave të linjitit në një qendër të energjisë së ripërtëritshme.
Green for Growth Fund ka mbështetur zhvillimin e këtij projekti, duke e vlerësuar si një ndër nismat pionere për integrimin e sistemeve të ruajtjes së energjisë në Ballkanin Perëndimor.
Renalfa IPP, me seli në Vjenë, zhvillon projekte të energjisë diellore, të erës dhe të sistemeve të ruajtjes së energjisë në disa vende të Evropës Juglindore dhe Qendrore, me fokus në projektet hibride që kombinojnë prodhimin dhe fleksibilitetin e sistemit.
Zbatimi i këtij sistemi pritet të rrisë qëndrueshmërinë e rrjetit elektrik, të lehtësojë integrimin e burimeve të ripërtëritshme dhe të ulë varësinë nga burimet fosile për balancim të sistemit.
