Nordex Group ka filluar prodhimin në fabrikën e re për krahët e turbinave të erës në Menemen të Izmirit, duke shënuar një zgjerim të rëndësishëm të kapaciteteve të saj industriale në Turqi dhe në tregun global të energjisë së erës.
Fabrika, e vendosur në Zonën e Lirë Tregtare të Izmirit, është ndërtuar për të përmbushur kërkesën në rritje për turbinat onshore me efikasitet të lartë. Në kapacitet të plotë, ajo pritet të prodhojë deri në 1,200 krahë turbine në vit dhe të punësojë rreth 1,200 persona.
Në impiant do të prodhohen modelet më të fundit të kompanisë, përfshirë N163 dhe N175, të dizajnuara për kushte të ndryshme të erës dhe për rritje të prodhimit të energjisë, transmeton Energy Monitor.
Fillimisht, prodhimi do të fokusohet në projektet e Turqisë të mbështetura nga skemat shtetërore YEKA, ndërsa më pas pritet të shtrihet edhe në tregjet evropiane, duke forcuar pozicionin e Nordex në industrinë e energjisë së erës.
Nordex është aktive në Turqi që nga viti 2009 dhe e konsideron vendin një nga tregjet kyçe për prodhim dhe zgjerim industrial.
