Ka hyrë zyrtarisht në fuqi marrëveshja ndërmjet Selisë së Shenjtë dhe Republikës së Italisë për ndërtimin e një termocentrali agrovoltaik në zonën ekstraterritoriale të Santa Maria di Galeria, ku ndodhen antenat e Radio Vatikanit që nga viti 1957.
Sipas deklaratës së publikuar nga Vatikani më 28 maj, hyrja në fuqi e marrëveshjes vjen pas përfundimit të procedurave të parashikuara nga Neni 5 i dokumentit të nënshkruar në korrik të vitit të kaluar.
Projekti synon të sigurojë energji për stacionin e Radio Vatikanit dhe furnizimin e plotë energjetik të Shtetit të Vatikanit, duke kombinuar prodhimin e energjisë së rinovueshme me përdorimin bujqësor të tokës.
Nisma është frymëzuar nga enciklika “Laudato si’” e Papa Françeskut, e cila thekson nevojën për zhvillimin e energjive të pastra dhe teknologjive të magazinimit të energjisë.
Papa Françesku e nisi zyrtarisht projektin përmes motu proprio “Fratello sole” të 26 qershorit 2024, duke udhëzuar institucionet përkatëse të Vatikanit që të ndërmarrin procedurat administrative për realizimin e sistemit agrovoltaik.
Marrëveshja ndërmjet Selisë së Shenjtë dhe Italisë u nënshkrua më 31 korrik 2025 në ambasadën italiane pranë Selisë së Shenjtë nga kryeipeshkvi Paul Richard Gallagher dhe ambasadori italian Francesco Di Nitto.
Sipas Vatikanit, projekti mbështetet edhe nga Papa Leoni XIV, i cili vizitoi Santa Maria di Galeria më 19 qershor 2025.
