Në diskutimet e fundit mbi orientimet energjetike të Kosovës, është rikthyer në vëmendje çështja e gazifikimit të linjitit dhe mënyra se si ky koncept po prezantohet në raport me alternativat e importit të gazit natyror të lëngshëm (LNG).
Janina Ymeri nga Lidhja Demokratike e Kosovës ka theksuar në një reagim publik se gazifikimi i qymyrit (linjitit) dhe LNG nga Shtetet e Bashkuara janë dy procese krejtësisht të ndryshme teknologjike dhe nuk kanë lidhje direkte mes tyre, pavarësisht mënyrës se si shpesh trajtohen në debatet publike.
Ymeri thekson se LNG është gaz natyror i importuar në formë të lëngshme, i cili më pas rigazifikohet për përdorim, ndërsa gazifikimi i linjitit është një proces industrial kompleks që kërkon teknologji të avancuar, investime të mëdha dhe infrastrukturë specifike për shndërrimin e qymyrit në gaz sintetik.
Sipas saj, një nga problemet kryesore në këtë debat është mungesa e një studimi të plotë të fizibilitetit teknik për gazifikimin e linjitit në Kosovë. Ajo argumenton se deri më tani nuk ekziston një analizë e verifikuar që të dëshmojë se një projekt i tillë është i realizueshëm, ekonomikisht i qëndrueshëm apo më i favorshëm se opsionet e tjera energjetike, përcjell Energy Monitor.
Në këtë kontekst, Ymeri vlerëson se promovimi i këtij koncepti në diskursin publik nuk mbështetet në prova të mjaftueshme teknike dhe mund të krijojë pritje jo realiste për zgjidhjen e krizës energjetike.
Ajo shton se një qasje e tillë rrezikon të shërbejë si arsyetim për vonesa në vendimmarrje strategjike, ndërkohë që Kosova vazhdon të përballet me import të energjisë elektrike dhe kosto të larta të furnizimit.
Në përfundim, ajo thekson se politikat energjetike duhet të bazohen në studime të plota fizibiliteti dhe analiza teknike të verifikuara, në mënyrë që vendimet strategjike të mos ndërtohen mbi projekte të paprovuara apo interpretime të pasakta teknologjike.
