Rajoni i Evropës Juglindore po shfaq potencial të lartë për investime në sistemet e magazinimit të energjisë elektrike, pasi rritja e kapaciteteve nga burimet e ripërtëritshme po krijon nevojë të madhe për fleksibilitet të rrjetit, sipas një raporti të ri të Rrjetit Evropian të Operatorëve të Sistemeve të Transmetimit të Energjisë Elektrike (ENTSO-E).
Sipas analizës së ENTSO-E, Evropa Juglindore është ndër rajonet me vlerën më të lartë potenciale për investime në magazinimin e energjisë, veçanërisht për shkak të zhvillimit të shpejtë të energjisë diellore dhe erës, si dhe nevojës për të balancuar sistemet elektroenergjetike, njofton Balkan Green Energy News.
Bateritë pritet të luajnë rol gjithnjë e më të rëndësishëm në tranzicionin energjetik, pasi mundësojnë ruajtjen e energjisë në periudhat kur prodhimi nga burimet e ripërtëritshme është i lartë dhe përdorimin e saj në momentet kur kërkesa rritet ose prodhimi bie.
Për vendet e Ballkanit Perëndimor, përfshirë Kosovën, zhvillimi i kapaciteteve të magazinimit shihet si një nga elementët kryesorë për integrimin e projekteve të reja solare dhe të erës. Këto teknologji mund të ndihmojnë në uljen e kufizimeve të rrjetit, përmirësimin e balancimit dhe rritjen e sigurisë së furnizimit, përcjell Energy Monitor.
Rritja e interesit për bateritë lidhet edhe me ndryshimet në tregun e energjisë elektrike. Me zgjerimin e prodhimit nga fotovoltaikët, gjithnjë e më shpesh shfaqen periudha me çmime të ulëta gjatë ditës, ndërsa kërkesa dhe çmimet rriten në orët e mbrëmjes. Bateritë mund të krijojnë vlerë ekonomike duke blerë energji në periudha me çmime më të ulëta dhe duke e kthyer atë në rrjet kur nevoja dhe çmimet janë më të larta.
Sipas ENTSO-E, megjithatë, magazinimi nuk duhet të shihet vetëm si teknologji e izoluar, por si pjesë e një sistemi më të gjerë që përfshin rrjetet e transmetimit, integrimin rajonal të tregjeve dhe menaxhimin më fleksibil të sistemit elektroenergjetik, përcjell Energy Monitor.
Në Kosovë, zhvillimi i baterive është pjesë e planeve për modernizimin e sektorit energjetik dhe për integrimin e kapaciteteve të reja nga energjia e ripërtëritshme. Me rritjen e investimeve në energjinë diellore dhe të erës, nevoja për fleksibilitet do të bëhet një nga çështjet kryesore të sigurisë energjetike në vitet e ardhshme.
Sipas vlerësimeve të ENTSO-E, rajonet me rritje të shpejtë të burimeve të ndryshueshme të energjisë kanë mundësi të konsiderueshme për investime në magazinim, duke e bërë Evropën Juglindore një treg gjithnjë e më interesant për zhvilluesit e projekteve të baterive.
