Akademia e Energjisë së Ripërtëritshme (RENAC) ka përfunduar trajnimin e parë në kuadër të programit për Tranzicionin Energjetik dhe Zbutjen e Ndryshimeve Klimatike në Kosovë.
Trajnimi u zhvillua më 18 dhe 19 gusht në Prishtinë dhe mblodhi profesionistë nga Ministria e Ekonomisë, Ministria e Mjedisit, Planifikimit Hapësinor dhe Infrastrukturës, Zyra e Rregullatorit për Energji (ZRRE) dhe LuxDev.
Sipas RENAC, sesioni dyditor ishte përqendruar në tregjet e energjisë, me pjesëmarrësit që trajtuan mekanizmat e tregut të energjisë elektrike në Kosovë dhe Bashkimin Evropian, përfshirë strukturat e tregut, tregtimin, balancimin, formimin e çmimeve dhe integrimin e energjisë së ripërtëritshme.
Trajnimi përfshiu prezantime nga ekspertë, ushtrime praktike, simulime të roleve të palëve të interesuara dhe diskutime në grupe, me synim lidhjen e njohurive teorike me zbatimin praktik.
Programi do të vijojë me module të tjera që lidhen me energjinë e ripërtëritshme, efiçiencën e energjisë, financimin e gjelbër dhe politikat publike, përcjell Energy Monitor.
Aktiviteti zhvillohet në kuadër të projektit “Tranzicioni Energjetik dhe Zbutja e Ndryshimeve Klimatike në Kosovë”, i financuar nga Dukati i Madh i Luksemburgut dhe i zbatuar nga LuxDev, Agjencia e Bashkëpunimit për Zhvillim e Luksemburgut.
RENAC tha se programi synon forcimin e kapaciteteve institucionale dhe shkëmbimin e njohurive ndërmjet institucioneve kryesore, me qëllim mbështetjen e tranzicionit energjetik dhe përpjekjeve për zbutjen e ndryshimeve klimatike në Kosovë.
