Komiteti Ekonomik dhe Social Evropian (KESE) ka kërkuar që vendet që synojnë anëtarësimin në Bashkimin Evropian të përfshihen më herët në politikat e bllokut për energjinë, klimën dhe industrinë, duke propozuar investime përpara anëtarësimit. Rekomandimet përfshijnë edhe Kosovën, e cila ka statusin e vendit potencial kandidat për BE-në.
Në qëndrimin e miratuar më 24 shtator dhe publikuar më 6 tetor, KESE-ja thekson se zgjerimi i BE-së duhet të jetë pjesë e planifikimit për arritjen e objektivave klimatike të vitit 2040 dhe neutralitetit klimatik deri më 2050. Sipas Komitetit, përafrimi i hershëm me rregullat evropiane mund të ulë kostot e ardhshme të zbatimit, të përmirësojë sigurinë energjetike dhe të krijojë kushte më të parashikueshme për investitorët.
Një nga propozimet është që vendet aspirante të kenë përparësi në partneritetet e ardhshme për investime klimatike. Këto investime do të mbështesnin modernizimin e sistemeve energjetike, zhvillimin e burimeve të ripërtëritshme dhe përdorimin e teknologjive me më pak ndotje.
Për Kosovën, rekomandimet kanë rëndësi të veçantë për shkak të mbështetjes së lartë të prodhimit të energjisë elektrike në linjit dhe nevojës për modernizimin e sistemit energjetik. Komiteti rekomandon gjithashtu lidhje më të ngushta të tregjeve energjetike të vendeve aspirante me tregun evropian, përmirësimin e raportimit të emetimeve dhe përgatitjen për mekanizmat e çmimit të karbonit.
Megjithatë, qëndrimi i KESE-së është rekomandim këshillimor dhe nuk përbën vendim për ndarjen e fondeve të reja për Kosovën. Komiteti i paraqet qëndrimet e tij institucioneve të BE-së, përfshirë Komisionin Evropian, Parlamentin Evropian dhe Këshillin e BE-së.
