Autoritetet iraniane kanë deklaruar se Ngushtica e Ngushtica e Hormuzit është mbyllur për lundrimin detar, duke sfiduar qëndrimin e Shteteve të Bashkuara se trafiku në këtë zonë vijon normalisht.
Sipas mediave shtetërore iraniane, Marina e Gardës Revolucionare ka njoftuar se nuk do të lejojë kalimin e anijeve nëpër ngushticë deri në një njoftim të dytë. Ky zhvillim vjen në kuadër të tensioneve të shtuara në rajon, pas përshkallëzimeve mes Iranit dhe Izraelit.
Megjithatë, Shtetet e Bashkuara të Amerikës kanë kundërshtuar menjëherë deklaratat e Teheranit, duke theksuar se trafiku detar vazhdon normalisht dhe se anijet tregtare nuk janë ndalur në këtë korridor kyç për tregtinë globale të energjisë.
Ngushtica e Hormuzit konsiderohet një nga rrugët më strategjike në botë për transportin e naftës dhe gazit, ku kalon një pjesë e madhe e furnizimeve globale me energji. Për këtë arsye, çdo tension në zonë ka ndikim të drejtpërdrejtë në tregjet ndërkombëtare dhe sigurinë energjetike.
Situata po monitorohet nga afër nga fuqitë globale, ndërsa përpjekjet diplomatike për të shmangur përshkallëzimin e mëtejshëm të krizës në Lindjen e Mesme vijojnë.
