Gjermania po kundërshton planin e Komisionit Evropian për vendosjen e një norme më të ulët tatimore për energjinë elektrike krahasuar me gazin natyror, duke paralajmëruar se mënyra e propozuar për miratimin e masës mund të cenojë sovranitetin fiskal të shteteve anëtare.
Sipas një letre të Ministrisë gjermane të Financave, Berlini kundërshton veçanërisht mundësinë që rregullat e reja të miratohen me shumicë të cilësuar. Gjermania argumenton se çështjet tatimore në BE kërkojnë unanimitet dhe se taksimi i energjisë duhet të trajtohet përmes legjislacionit tatimor të BE-së.
Përplasja lidhet me përpjekjet e BE-së për të përshpejtuar elektrifikimin e industrisë, transportit dhe sektorit energjetik. Komisioni Evropian synon që elektrifikimi të arrijë në 46% deri në vitin 2040, ndërsa çmimet e larta të energjisë elektrike krahasuar me gazin po konsiderohen një pengesë për këtë proces, përcjell Energy Monitor.
Komisioni argumenton se ulja e barrës tatimore mbi energjinë elektrike mund ta bëjë elektrifikimin më konkurrues dhe të nxisë përdorimin e teknologjive të pastra, përfshirë pompat e nxehtësisë.
Gjermania, megjithatë, kërkon që çështja e taksimit të energjisë elektrike të trajtohet përmes Direktivës së Taksimit të Energjisë, dhe jo përmes legjislacionit për tregun e energjisë elektrike.
Sipas të dhënave të Komisionit Evropian, tarifat e rrjetit dhe taksat përbëjnë një pjesë të konsiderueshme të faturave të energjisë elektrike, duke rritur më tej diferencën e çmimeve me gazin.
Negociatat mes Parlamentit Evropian dhe Këshillit të BE-së për këtë çështje pritet të nisin pas pushimeve të verës.
