Rumania ka miratuar 108.86 milionë euro ndihmë shtetërore për shtatë projekte që synojnë rritjen e efikasitetit energjetik në industrinë e rëndë.
Projektet, me vlerë totale prej rreth 290 milionë eurosh, janë përzgjedhur përmes një procedure konkurruese dhe synojnë optimizimin e konsumit të energjisë në kompanitë e përfshira në sistemin evropian të tregtimit të emetimeve (ETS).
Ndër përfituesit janë prodhuesi i plehrave kimike Azomureș, prodhuesi kimik Chimcomplex, kompania e naftës dhe gazit OMV Petrom, si dhe kompani nga sektorët e çimentos, çelikut dhe industrisë së letrës, përcjell Energy Monitor.
Azomureș do të marrë shumën më të madhe, 28.04 milionë euro, për investime në rritjen e efikasitetit dhe elektrifikimin e proceseve të prodhimit të acidit nitrik, ndërsa OMV Petrom do të përfitojë 23.25 milionë euro për një projekt në rafinerinë Petrobrazi.
Sipas autoriteteve rumune, shtatë projektet pritet të ulin konsumin e energjisë me rreth 990 mijë MWh në vit dhe emetimet e gazeve serrë me rreth 239 mijë tonë CO₂ ekuivalent në vit.
Financimi bëhet përmes skemës së Fondit për Modernizim të Rumanisë.
