Në një hap të rëndësishëm për zhvillimin e qëndrueshëm energjetik, Kuvendi i Maqedonisë së Veriut ka miratuar Ligjin për Efiçiencë Energjetike, i cili synon të ulë konsumimin e energjisë, të përmirësojë cilësinë e ajrit dhe të harmonizojë legjislacionin me standardet evropiane.
Ligji parashikon që masat për efiçiencë energjetike të jenë prioritet në politikat dhe investimet energjetike. Ai përfshin zhvillimin e një strategjie afatgjatë për rehabilitimin e ndërtesave banesore, publike dhe komerciale në objekte me efiçiencë të lartë energjetike, si dhe detyrimin për rehabilitimin e të paktën 3% të ndërtesave publike çdo vit.
Gjithashtu, ligji parashikon instalimin e sistemeve solare në shkolla, kopshte dhe institucione publike gjatë ndërtimit ose rinovimit, si dhe ofron mbështetje financiare për investime në panele solare, sisteme gjeotermale dhe teknologji inteligjente. Përmirësohen standardet në prokurimin publik, rritet transparenca digjitale dhe profesionalizimi i kontrollit energjetik, ndërsa certifikatat e karakteristikave energjetike do të integrohen në Kadastër për të inkurajuar bashkëpunimin ndër-komunal.
Ky ligj shënon një hap të rëndësishëm drejt krijimit të një sistemi energjetik të qëndrueshëm, duke ulur kostot për qytetarët dhe bizneset, duke përshpejtuar integrimin e burimeve të rinovueshme dhe duke kontribuar në një sektor energjetik më të efiçient. Ministria e Energjisë, Minierave dhe Burimeve Minerale mbetet e angazhuar për realizimin e plotë të reformave dhe harmonizimin me legjislacionin evropian.
