Grupi i Energjisë i KUSA-s po vazhdon të nxisë diskutime të rëndësishme mbi të ardhmen energjetike të Kosovës. Anëtarët e grupit, Shqipe Vela, Drita Desku, Shend Boshnjaku dhe Erdoan Zasella, mbajtën një ligjëratë në RIT Kosovo mbi prosumerizmin dhe energjinë diellore nga panelet në çati.
Sesioni nxori në pah rolin gjithnjë e më të rëndësishëm të prosumerëve në uljen e varësisë nga energjia, përmirësimin e efikasitetit dhe kontribuimin në një miks më të pastër energjetik. Diskutimi trajtoi edhe sfidat kryesore, si boshllëqet rregullatore, kostot fillestare dhe ndërgjegjësimin e publikut.
Në përfundim, u prezantuan rekomandime politike për mbështetjen e adoptimit të energjisë diellore dhe fuqizimin e familjeve dhe bizneseve për të marrë pjesë aktive në tregun e energjisë.
Ligjërata theksoi rëndësinë e krijimit të kushteve të favorshme që lejojnë qytetarët dhe kompanitë të kontribuojnë drejtpërdrejt në tranzicionin energjetik të vendit.
Çka është KUSA?
KUSA (Kosovo United States Alumni) është një organizatë jo-fitimprurëse e themeluar në vitin 2007 me ndihmën e Ambasadës së SHBA-së në Kosovë dhe bordit të saj themelues.
Ajo përbëhet nga mbi 1,500 anëtarë që kanë pasur mundësinë të përfitojnë bursa dhe të marrin pjesë në programe shkëmbimi dhe trajnimi të financuara nga Qeveria e SHBA-së për të studiuar në Shtetet e Bashkuara të Amerikës.
