Parku diellor Kalyon Karapınar në provincën Konya të Turqisë, një prej instalimeve më të mëdha fotovoltaike globalisht – duke përjashtuar ato në Kinë – po zgjerohet me 500,5 megavat kapacitete tjera. Me këtë zgjerim, kapacitetet e këtij parku fotovoltaik pritet të arrijnë në 1,85 GW.
Parku ekzistues, me kapacitet 1,35 GW peak, nga vitit 2023 furnizon energji për miliona përdorues, ndërsa përmes shtimit të kapaciteteve të reja synon të avancojë më tej prodhimin e energjisë diellore. Zona e zgjerimit shtrihet në një sipërfaqe prej rreth 643 hektarësh, me plan për të instaluar rreth një milion panele të reja.
Me kompletimin e zgjerimit, pritet që parku të prodhojë mbi 1 TWh energji elektrike në vit – një përmirësim i madh në prodhimin total që kompleksi mund të sigurojë.
Ky lajm thekson se investimet në skala të mëdha në energji diellore mbeten themelore për tranzicionin energjetik global dhe për reduktimin e varësisë nga burimet fosile. Për vende në rajon si Kosova, kjo zgjidhje përfaqëson një model frymëzues — tregues se me vullnet dhe plane adekuate, është e mundur të ndërtohen kapacitete të mëdha për energji të pastër.
