Në Bruksel është mbajtur Plenumi Parlamentar i Komunitetit të Energjisë, ku eurodeputetë nga vendet e Evropës Juglindore dhe Lindore, së bashku me anëtarë të Parlamentit Evropian, diskutuan për forcimin e sigurisë energjetike dhe integrimin e tregjeve të energjisë.
Në qendër të diskutimeve ishte nevoja për integrim më të thellë të tregjeve të gazit dhe energjisë elektrike, me synim rritjen e rezistencës ndaj goditjeve të çmimeve dhe krizave të furnizimit. U theksua se bashkëpunimi më i ngushtë ndërmjet Bashkimit Evropian dhe vendeve të Komunitetit të Energjisë është thelbësor për stabilitetin afatgjatë të sistemit energjetik evropian.
Në plenum morën pjesë edhe përfaqësues të lartë, përfshirë Komisionerin e BE-së për Energji dhe Strehim, Dan Jørgensen, si dhe Drejtorin e Sekretariatit të Komunitetit të Energjisë, Artur Lorkowski, të cilët theksuan nevojën për mbështetje më të fortë politike për zbatimin e reformave kyçe në sektorin e energjisë, njofton Energy Monitor.
Jørgensen deklaroi se krizat aktuale energjetike duhet të shërbejnë si një thirrje për veprim të përshpejtuar, duke theksuar se varësia nga rajone të paqëndrueshme dhe nga sistemet e vjetruara energjetike përbën rrezik që nuk mund të injorohet më. Ai shtoi se bashkëpunimi energjetik mbetet themel i paqes, prosperitetit dhe sigurisë në Evropë.
Nga ana tjetër, Lorkowski theksoi nevojën për tejkalimin e ndarjeve politike dhe gjeografike, si dhe për krijimin e një sistemi të unifikuar energjetik evropian përmes integrimit më të shpejtë të tregjeve të energjisë mes BE-së dhe vendeve të Komunitetit të Energjisë, madje edhe para anëtarësimit të tyre në BE.
Diskutimet u fokusuan gjithashtu në harmonizimin e rregullave të tregut të gazit, përfshirë zbatimin e përbashkët të kodeve të rrjetit të BE-së, si një hap drejt integrimit më të thellë dhe forcimit të rolit të rajonit si nyje tranziti dhe magazinimi energjetik, përcjell Energy Monitor.
Paralelisht, u theksua rëndësia e integrimit të tregut të energjisë elektrike përmes lidhjes me tregjet evropiane, çka do të mundësonte tregje më konkurruese dhe më rezistente ndaj luhatjeve të çmimeve. U nënvizua gjithashtu se disa vende tashmë kanë avancuar në përafrimin e legjislacionit përkatës, ndërsa të tjerat pritet të ndjekin këtë proces.
Në takim u theksua edhe nevoja që politikat evropiane të njohin më mirë energjinë elektrike nga burime të ripërtëritshme në rajon, në mënyrë që të shmangen disincentivat për tregtinë e energjisë së pastër përmes mekanizmave të taksimit të karbonit.
