Drejtoresha ekzekutive e MCA Kosovës do të prezantojë projektet e ruajtjes së energjisë me bateri dhe rolin e tyre në forcimin e sigurisë energjetike dhe integrimin e burimeve të ripërtëritshme në Kosovë.
Florina Duli Sefaj, drejtoreshë ekzekutive e MCA Kosovës, do të jetë një nga folëset në edicionin e pestë të konferencës Energy Week Western Balkans, e cila do të mbahet më 7-8 tetor 2026 në Maestral Resort, Mal të Zi.
Sipas njoftimit të organizatorëve, nën udhëheqjen e Sefajt, MCA Kosova po zbaton një nga iniciativat më të rëndësishme energjetike në rajon përmes Programit Kompakt të MCC-së për Kosovën, përfshirë zhvillimin e 340 MWh kapaciteteve të ruajtjes së energjisë me bateri, përcjell Energy Monitor.
Investimi synon të rrisë stabilitetin e rrjetit, të forcojë sigurinë energjetike të Kosovës dhe të mundësojë integrimin më të madh të energjisë nga burimet e ripërtëritshme në sistemin energjetik.
Përveç projekteve të ruajtjes së energjisë, MCA Kosova është e angazhuar edhe në zhvillimin e kapaciteteve të reja profesionale në sektorin energjetik dhe krijimin e kushteve për tërheqjen e investimeve private në këtë sektor, thuhet në njoftim.
Energy Week Western Balkans, fokusi në tranzicionin energjetik të rajonit
Energy Week Western Balkans është një nga konferencat kryesore rajonale për sektorin e energjisë, që bashkon përfaqësues të qeverive, rregullatorëve, kompanive energjetike, investitorëve dhe institucioneve financiare për të diskutuar zhvillimet kryesore në tranzicionin energjetik.
Edicioni i pestë i konferencës do të fokusohet në energjinë e ripërtëritshme, ruajtjen e energjisë me bateri, modernizimin e rrjeteve, fleksibilitetin e sistemit, integrimin rajonal të tregjeve dhe financimin e projekteve të reja energjetike, njofton Energy Monitor.
Konferenca do të mbahet më 7-8 tetor 2026 në Maestral Resort, Mal të Zi, duke sjellë së bashku institucionet dhe kompanitë që po ndikojnë në zhvillimin e sektorit energjetik në Ballkanin Perëndimor.
