Shtetet e Bashkuara të Amerikës kanë zgjatur edhe një herë përjashtimin e përkohshëm nga sanksionet për kompaninë serbe të naftës Naftna Industrija Srbije (NIS), duke i dhënë kompanisë mundësi të vazhdojë aktivitetet operative ndërsa vazhdojnë negociatat për ndryshimin e strukturës së pronësisë.
Vendimi i ri i lejon NIS-it të vazhdojë operimin deri më 28 gusht 2026, ndërsa palët po punojnë për një zgjidhje afatgjatë për largimin e pronësisë ruse nga kompania, e cila është në qendër të masave amerikane për shkak të lidhjeve me kompanitë ruse Gazprom Neft dhe Gazprom.
NIS është kompania më e rëndësishme e naftës në Serbi dhe operon rafinerinë e vetme të naftës në vend, atë në Pançevë. Funksionimi i saj konsiderohet me rëndësi strategjike për furnizimin e tregut serb me derivate të naftës.
Negociatat për aksionet ruse vazhdojnë
Përjashtimi nga sanksionet i jep Serbisë kohë shtesë për të përfunduar bisedimet për ndryshimin e pronësisë së NIS-it. Sipas raportimeve, një nga opsionet kryesore është blerja e aksioneve ruse nga kompania hungareze MOL, e cila ka qenë në negociata me palët përkatëse.
Qeveria serbe ka deklaruar më herët se prioriteti kryesor është vazhdimi i punës së rafinerisë së Pançevës dhe ruajtja e sigurisë së furnizimit me karburante. Autoritetet në Beograd kanë paralajmëruar se zgjidhja e çështjes së pronësisë është thelbësore për funksionimin afatgjatë të kompanisë.
NIS dhe furnizimi me naftë përmes Kroacisë
Në muajt e fundit, operimi i NIS-it është mbështetur edhe nga vazhdimet e njëpasnjëshme të licencave amerikane që kanë lejuar furnizimin me naftë të papërpunuar përmes sistemit të naftësjellësit kroat JANAF. Kjo rrugë furnizimi është një nga arteriet kryesore për dërgimin e naftës drejt rafinerisë së Pançevës.
Çështja e NIS-it është bërë një nga temat kryesore të sigurisë energjetike në Serbi, pasi kompania mbetet një hallkë kyçe për furnizimin me karburante, ndërsa Beogradi kërkon të shmangë ndërprerjet dhe të sigurojë një zgjidhje të qëndrueshme për të ardhmen e kompanisë.
