Sistemet e ruajtjes së energjisë me bateri që mund të furnizojnë energji elektrike për katër orë tashmë kanë kosto më të ulët se turbinat me gaz që përdoren për të mbuluar kulmin e kërkesës në 43 tregje të botës.
Ky është përfundimi i analizës së fundit të kompanisë kërkimore Wood Mackenzie, të raportuar nga Balkan Green Energy News.
Krahasimi përfshin koston e nivelizuar të energjisë elektrike (LCOE) nga sistemet e ruajtjes me bateri dhe turbinat me gaz me cikël të hapur, të cilat aktivizohen kur kërkesa rritet ose kur nevojitet fleksibilitet shtesë në rrjet, përcjell Energy Monitor..
Me rritjen e prodhimit nga era dhe dielli, roli i termocentraleve me gaz po zhvendoset gjithnjë e më shumë nga prodhimi i vazhdueshëm drejt balancimit të sistemit dhe mbulimit të kërkesës në orët e pikut. Bateritë mund të ofrojnë një pjesë të këtij fleksibiliteti, duke ruajtur energjinë kur është në dispozicion dhe duke e kthyer atë në rrjet kur nevojitet.
Kostot e baterive pritet të vazhdojnë të bien
Sipas Wood Mackenzie, kostoja e sistemeve të baterive në Evropë është rritur me rreth 2% gjatë vitit 2026, duke shënuar rritjen e parë në tre vjet. Çmimet e qelizave të baterive janë rikuperuar me rreth 10% nga niveli i ulët i vitit 2025, mes kërkesës më të lartë dhe shtrenjtimit të litiumit. Megjithatë, analiza parashikon që shpenzimet kapitale për sistemet e ruajtjes të bien me 12% deri në vitin 2031.
Kina vazhdon të ketë avantazh të konsiderueshëm në koston e ruajtjes në shkallë të rrjetit, falë zinxhirit të integruar të furnizimit dhe prodhimit masiv. Kjo tregon se konkurrueshmëria e baterive varet jo vetëm nga teknologjia, por edhe nga kostot e prodhimit, furnizimi me materiale dhe zhvillimi i tregut.
A po vjen trendi i baterive edhe në Kosovë?
Kosova po përgatitet të instalojë sisteme të ruajtjes së energjisë me bateri me kapacitet të përgjithshëm prej 170 MW dhe 340 MWh, në kuadër të Kompaktit të MCC-së. Projekti përfshin një sistem prej 250 MWh në Istog dhe një tjetër prej 90 MWh në Sojevë të Ferizajt.
Rënia e kostove të ruajtjes mund të ketë rëndësi për investimet e ardhshme në bateri, sidomos teksa Kosova shton kapacitetet e energjisë së ripërtëritshme. Megjithatë, krahasimi ndërkombëtar i Wood Mackenzie nuk nënkupton automatikisht se bateritë do të jenë më të lira në çdo situatë në Kosovë: kostoja përfundimtare varet nga çmimi i pajisjeve, financimi, lidhja me rrjetin, kohëzgjatja e ruajtjes dhe mënyra e operimit.
