Mali i Zi pritet të marrë më 19 nëntor miratimin për mbylljen e përkohshme të Kapitullit 15 të negociatave me Bashkimin Evropian, që mbulon sektorin e energjisë.
Sipas Ministrisë së Energjisë dhe Minierave, vendi ka përmbushur kriteret e kërkuara për këtë kapitull. Qeveria malazeze ka miratuar edhe pozicionin e përditësuar negociues, duke hapur rrugën për vendimin në konferencën ndërqeveritare që do të mbahet në Bruksel.
Ministri i Energjisë, Admir Šahmanović, e ka cilësuar këtë zhvillim si rezultat të reformave për modernizimin e sektorit energjetik.
Reformat përfshijnë përafrimin e tregut të energjisë elektrike me atë të Bashkimit Evropian, zhvillimin e burimeve të ripërtëritshme, rritjen e efiçiencës energjetike dhe krijimin e rezervave strategjike të produkteve të naftës, përcjell Energy Monitor.
Mbyllja e kapitullit do të ishte një hap tjetër drejt integrimit evropian të Malit të Zi, i cili synon t’i përfundojë negociatat e anëtarësimit brenda vitit 2026.
Më 6 nëntor, Mali i Zi mbylli përkohësisht edhe dy kapituj të tjerë, për lëvizjen e lirë të mallrave dhe sigurinë ushqimore. Me këtë zhvillim, numri i kapitujve të mbyllur përkohësisht arriti në 23.
Qeveria e kryeministrit Milojko Spajić synon nënshkrimin e marrëveshjes së anëtarësimit gjatë vitit 2027 dhe anëtarësimin në Bashkimin Evropian në vitin 2028.
