Sipas Financial Times, tetë kompani greke renditen mes 20 përfituesve më të mëdhenj nga transporti i naftës ruse
Kompanitë greke të transportit detar kanë përfituar të paktën 3.8 miliardë dollarë nga transporti i naftës ruse gjatë tre viteve të fundit, pavarësisht përpjekjeve të vendeve të G7 për të kufizuar të ardhurat e Kremlinit nga eksportet e energjisë. Kështu raporton Financial Times.
Sipas raportit, kompanitë Dynacom Tankers, Stealth Maritime dhe Olympic Shipping and Management, pjesë e grupit Onassis Group, kanë rritur të ardhurat nga transporti i naftës ruse në kuadër të regjimit të kufizimit të çmimit të vendosur nga G7.
Përfituesja më e madhe rezulton të jetë Dynacom Tankers, e themeluar nga manjati grek i transportit detar George Prokopiou. Sipas vlerësimeve të Financial Times, që nga korriku i vitit 2023 kompania ka siguruar të paktën 915 milionë dollarë të ardhura nga transporti i naftës ruse.
Ndërkohë, Olympic Shipping and Management ka përfituar të paktën 404 milionë dollarë, ndërsa kompanitë athinase Stealth Maritime dhe Polembros Shipping kanë arkëtuar secila mbi 200 milionë dollarë nga ky aktivitet.
Roli i kompanive greke në transportin e naftës ruse është bërë burim tensionesh mes Athinës dhe Kievit.
Në vitin 2023, autoriteti ukrainas përgjegjës për sanksionet përfshiu disa kompani greke të transportit detar, mes tyre edhe Dynacom, në listën e “sponsorëve ndërkombëtarë të luftës”, por ato u hoqën më vonë nga kjo listë pas presionit të ushtruar nga qeveria greke.
Tregtia e naftës ruse mbetet e lejuar, për sa kohë që respekton kufirin e çmimit të vendosur nga vendet e G7.
Megjithatë, muajt e fundit është shtuar presioni për forcimin e regjimit të sanksioneve, ndërsa Shtetet e Bashkuara dhe Bashkimi Evropian synojnë të dobësojnë të ardhurat energjetike të Rusisë përpara çdo marrëveshjeje të mundshme paqeje me Ukrainën.
Sipas Financial Times, qeveritë perëndimore po shqyrtojnë masa të reja që mund të kufizojnë më tej të ardhurat e Moskës nga energjia, duke rrezikuar edhe aktivitetin e kompanive greke në këtë sektor.
Raporti thekson gjithashtu se nga 20 kompanitë që kanë përfituar më shumë nga transporti i naftës ruse që prej qershorit 2023, tetë janë greke. Pjesa tjetër përbëhet kryesisht nga kompani të transportit detar të mbështetura nga shteti rus, si Sovkomflot dhe Rosnefteflot.
/albanianpost.com
