Çmimi i naftës është tashmë më i larti i regjistruar ndonjëherë në Portugali, ndërsa benzina ka arritur nivelin më të lartë që nga kriza energjetike pas pushtimit rus të Ukrainës në vitin 2022.
Rritja e re e çmimeve të naftës dhe benzinës ka nxjerrë shoferët në rrugët e Portugalisë, ndërsa karburantet kanë arritur nivele rekord në vend dhe po shtrenjtohen në të gjithë Europën.
Në Lisbonë, dhjetëra automjete protestuan duke i rënë borive në urën “25 Prilli”, që lidh kryeqytetin me Almadan. Në jug të vendit, një tjetër protestë me automjete që lëviznin me shpejtësi të ulët u nis drejt rafinerisë së “Galp” në Sines. Sipas Gardës Kombëtare Republikane, në të morën pjesë qindra automjete. Protestuesit mbanin flamuj portugezë dhe pankarta kundër rritjes së çmimeve.
Sipas të dhënave të “Automobile Club of Portugal”, të hënën nafta u rrit me 15 centë, duke arritur në 2.169 euro për litër, ndërsa benzina u shtrenjtua me 12 centë, në 2.142 euro për litër.
Pas ndërhyrjes së qeverisë përmes uljes së përkohshme të taksës mbi produktet e naftës, rritja reale ishte përkatësisht 12 dhe 9 centë.
Çmimi i naftës është tashmë më i larti i regjistruar ndonjëherë në Portugali, ndërsa benzina ka arritur nivelin më të lartë që nga kriza energjetike pas pushtimit rus të Ukrainës në vitin 2022.
Rritja nuk është vetëm portugeze. Çmimet e karburanteve janë rritur në disa vende europiane, të ndikuara nga tensionet në Lindjen e Mesme, bllokimi i trafikut në ngushticën e Hormuzit dhe kapacitetet e kufizuara të rafinerive, veçanërisht për naftën.
Qeveria portugeze thotë se po merr masa për të zbutur goditjen ndaj familjeve, ndërsa autoritetet europiane po shqyrtojnë edhe mundësinë e një takse të jashtëzakonshme mbi fitimet e kompanive të naftës.
