Kryeministri Albin Kurti ka zhvilluar në New York një takim me drejtoreshën menaxhuese të Fondit Monetar Ndërkombëtar (FMN), Kristalina Georgieva, ku ndër të tjera është diskutuar për rritjen e çmimeve të naftës dhe krizën energjetike.
Sipas Kurtit, gjatë takimit është diskutuar për partneritetin ndërmjet Kosovës dhe FMN-së, si dhe për reformat që, sipas tij, synojnë rritjen e produktivitetit, investimeve dhe eksporteve dhe pjesëmarrjen më të madhe në fuqinë punëtore.
Kurti tha se gjatë këtij viti Kosova ka shënuar rritje ekonomike prej 5.4 për qind në tremujorin e parë dhe 4.1 për qind në tremujorin e dytë. Të dhënat për tremujorin e parë të vitit tregojnë rritje vjetore prej 5.4 për qind, përcjell Energy Monitor.
Në takim është diskutuar edhe për ndikimin e rritjes së çmimeve të naftës dhe krizës energjetike në ekonomitë e vendeve, si dhe për mekanizmat dhe masat që mund të përdoren për përballimin e tyre.
Kurti tha se Qeveria synon të zgjerojë programin SuperPuna për gratë dhe të vazhdojë zhvillimin e sistemit të arsimit dual, si pjesë e agjendës së saj të reformave.
Takimi u zhvillua në kuadër të qëndrimit të Kurtit në New York, ndërsa kryeministri tha se e ka falënderuar Georgievën për bashkëpunimin e vazhdueshëm me FMN-në dhe shprehu pritjen që ky bashkëpunim të thellohet më tej.
