Kamenica është drejt finalizimit të Planit të mobilitetit të qëndrueshëm urban, dokument strategjik që synon të përcaktojë mënyrën e zhvillimit të lëvizshmërisë në komunë për dhjetë vitet e ardhshme.
Në një punëtori dyditore, grupi punues shumëdisiplinor i Komunës së Kamenicës, me mbështetjen e UN-Habitat Kosovës dhe Friedrich Ebert Stiftung (FES), ka punuar në versionin përfundimtar të planit.
Gjatë punëtorisë është shqyrtuar analiza e gjendjes aktuale të mobilitetit, ndërsa janë rishikuar vizioni, qëllimet dhe objektivat e planit, si dhe masat për zbatimin e tij. Pjesë e diskutimeve ishte edhe plani i veprimit, i cili është përshtatur me kornizën afatmesme buxhetore të komunës, njofton Energy monitor.
Plani mbështetet në Planin Zhvillimor Komunal dhe synon të ndërlidhet me strategjitë e tjera lokale. Në qendër të tij është koncepti i një qyteti aktiv, ku ecja dhe çiklizmi do të kenë rol më të madh në lëvizjen e banorëve.
Dokumenti përfshin gjithashtu masa për zhvillimin e transportit publik urban, menaxhimin e parkingjeve, mbrojtjen e mjedisit dhe rregullimin e lëvizjeve të transportit dhe logjistikës, përcjell Energy monitor.
Masat e përcaktuara në plan do të monitorohen dhe përditësohen përmes një baze të të dhënave, me synimin që të krijohet një sistem më i qëndrueshëm dhe më i organizuar i mobilitetit në Kamenicë gjatë periudhës dhjetëvjeçare.
UN-Habitat ka zhvilluar udhëzime të posaçme për planifikimin e mobilitetit të qëndrueshëm urban në qytetet e Kosovës, duke e trajtuar këtë qasje si një instrument për përmirësimin e qasjes në transport, cilësisë së jetës, sigurisë rrugore dhe cilësisë së mjedisit.
Në Kosovë, planet e tilla synojnë të ndërlidhin planifikimin urban me nevojat e transportit, lëvizjen e njerëzve dhe mallrave, si dhe investimet në infrastrukturë dhe shërbime të mobilitetit.
