Rreth 800 kompani turke operojnë në Shqipëri, ndërsa vlera e përgjithshme e investimeve të tyre ka arritur në 3,5 miliardë dollarë, deklaroi Serhat Kisakurek, kryetar i Këshillit të Biznesit Turqi-Shqipëri pranë Këshillit për Marrëdhëniet Ekonomike me Jashtë të Turqisë (DEIK).
Në një intervistë për Anadolu, Kisakurek tha se marrëdhëniet ekonomike ndërmjet dy vendeve janë forcuar vitet e fundit, të nxitura nga rritja e tregtisë dhe investimeve, si dhe nga mundësitë për bashkëpunim në sektorë si energjia, infrastruktura, transporti, turizmi dhe financat.
Sipas tij, vëllimi tregtar ndërmjet Turqisë dhe Shqipërisë ishte rreth 965 milionë dollarë vitin e kaluar. Megjithatë, të dyja vendet synojnë ta rrisin atë në 2 miliardë dollarë, duke zgjeruar njëkohësisht investimet dhe partneritetet afatgjata.
„Synimi ynë i përbashkët për periudhën e ardhshme është ta çojmë vëllimin tregtar në 2 miliardë dollarë. Megjithatë, për ne është e rëndësishme që rritja e vëllimit tregtar të shoqërohet me diversifikimin e investimeve të ndërsjella dhe zhvillimin e partneriteteve ekonomike afatgjata”, tha Kisakurek.
Energjia dhe infrastruktura ndër sektorët me potencial
Kompanitë turke kanë prani të konsiderueshme në sektorët bankar dhe financiar, energji, infrastrukturë, ndërtim dhe prodhim në Shqipëri. Kisakurek veçoi si fusha me potencial për investime të reja energjinë e ripërtëritshme, magazinimin e energjisë, infrastrukturën e transportit, minierat, turizmin dhe logjistikën.
Ai tha se përvoja e kompanive turke në kontraktimin ndërkombëtar, zhvillimin e projekteve energjetike dhe financim mund të përputhet me nevojat e Shqipërisë për zhvillim dhe modernizim.
Sipas tij, përparimi i Shqipërisë në procesin e anëtarësimit në Bashkimin Evropian mund të krijojë mundësi të reja për investime, veçanërisht në energji, transport, mjedis, digjitalizim dhe industri.
„Pritshmëria jonë është që, krahas përparimit në procesin e anëtarësimit në BE, të rriten investimet e drejtpërdrejta nga Turqia në Shqipëri”, tha ai.
Synimi për zgjerimin e bashkëpunimit ekonomik
Kisakurek vlerësoi se afërsia historike dhe kulturore ndërmjet dy vendeve, si dhe mbështetja politike për forcimin e marrëdhënieve, krijojnë kushte të favorshme për zgjerimin e bashkëpunimit ekonomik.
Ai theksoi gjithashtu rëndësinë strategjike të pozitës gjeografike të Shqipërisë dhe daljes së saj në detin Adriatik, që sipas tij mund ta bëjë vendin një nyje të rëndësishme logjistike ndërmjet Ballkanit dhe pjesëve të tjera të Evropës.
Kryetari i Këshillit të Biznesit Turqi-Shqipëri përmendi edhe vizitën e delegacionit të DEIK-ut në Tiranë më 7 dhe 8 tetor, gjatë së cilës u diskutuan mundësitë për bashkëpunim dhe investime të reja.
Ai tha se synimi është që kontaktet e krijuara gjatë vizitës të shndërrohen në partneritete konkrete tregtare dhe projekte investimi.
