Egjipti ka njoftuar zbulimin e një rezervuari të ri të gazit natyror në Detin Mesdhe, pas rezultateve pozitive të shpimit në pusin eksplorues Nasim-1X, në zonën e koncesionit Tiba. Vlerësimet fillestare tregojnë se rezervuari përmban rreth 200 miliardë këmbë kub gaz natyror, ose afërsisht 5.7 miliardë metra kub.
Ministria egjiptiane e Naftës dhe Burimeve Minerale bëri të ditur më 6 nëntor se shpimi dhe vlerësimet paraprake kanë identifikuar një shtresë gazmbajtëse me trashësi neto prej rreth 15 metrash, me karakteristika të favorshme gjeologjike dhe petrofizike, përcjell Energy Monitor.
Koncesioni Tiba operohet nga kompania italiane Eni në partneritet me kompaninë australiane Woodside, ndërsa shpimi i pusit është realizuar nga kompania egjiptiane Petrobel në emër të partnerëve.
Studimet për rezervat dhe prodhimin
Autoritetet egjiptiane kanë bërë të ditur se studimet teknike dhe analizat e rezervuarit janë ende në zhvillim. Ato synojnë të përcaktojnë sasinë e gazit që mund të nxirret, kapacitetin e mundshëm ditor të prodhimit dhe qëndrueshmërinë ekonomike të projektit.
Për këtë arsye, vlerësimi prej 5.7 miliardë metrash kub nuk duhet të konsiderohet si sasi e konfirmuar e rezervave të shfrytëzueshme. Ende nuk është bërë e ditur se kur mund të nisë prodhimi, raporton Energy Monitor.
Ministria ka njoftuar gjithashtu planet për lidhjen e pusit me infrastrukturën ekzistuese përmes një tubacioni rreth 22 kilometra të gjatë, që do të lidhet me gazsjellësin Abu Madi–El Gamil. Shfrytëzimi i infrastrukturës ekzistuese synon të shkurtojë kohën dhe kostot e nevojshme për vënien në prodhim të zbulimit.
Egjipti synon të rrisë prodhimin vendor
Zbulimi vjen në një periudhë kur Egjipti po përpiqet të rikuperojë prodhimin vendor të gazit natyror, pas rënies së prodhimit në vitet e fundit dhe rritjes së varësisë nga importet për të përmbushur kërkesën e brendshme.
Kairoja synon të përshpejtojë kërkimet dhe zhvillimin e vendburimeve të reja për të mbështetur furnizimin me gaz të centraleve elektrike dhe industrisë, raporton Energy Monitor.
Ministria e ka lidhur rezultatin pozitiv të shpimit me rritjen e investimeve në kërkim dhe përmirësimin e kushteve për kompanitë ndërkombëtare të energjisë, përfshirë shlyerjen e detyrimeve financiare ndaj partnerëve të huaj.
Megjithatë, ndikimi i zbulimit të ri në furnizimin e Egjiptit do të varet nga rezultatet përfundimtare të studimeve, sasia e gazit të nxjerrshëm dhe realizimi i infrastrukturës së nevojshme.
