Në kuadër të Kosova Energy Forum & Green Business Expo 2025, u zhvillua paneli me temën “Powering Kosovo with the Sun: Policies for a Renewable Future”, i cili mbledhi ekspertë të fushës së energjisë diellore. Panelistë si Mustafë Borovci, Trim Tërnava dhe Afrim Syla, nën moderimin e Flutur Mustafa Pllana, diskutuan sfidat dhe mundësitë që ka sektori solar në Kosovë.
Gjatë diskutimit, u evidentuan mangësitë e politikave zhvillimore për energjinë rinovueshme, të cilat shpesh pengojnë investimet dhe zhvillimin e bizneseve në sektorin diellor.
Panelistët dhe pjesëmarrësit ranë dakord se është e domosdoshme të forcohet koordinimi ndërinstitucional, të vendoset një hierarki e qartë përgjegjësish, si dhe të përmirësohet komunikimi horizontal përtej atij vertikal.
Një tjetër çështje e rëndësishme e ngritur ishte reduktimi i burokracisë së tepërt, që shpesh përbën pengesë për kompanitë e energjisë së rinovueshme.
Pjesëmarrësit theksuan se ofrimi i lehtësirave dhe mbështetjes për zhvillimin e sektorit solar është i nevojshëm për të nxitur investimet dhe për të siguruar një të ardhme energjetike më të qëndrueshme për Kosovën.
