Pas një proteste të transmetuar nga Klan Kosova më 18 janar 2026, ku qytetarët shfaqën pakënaqësi për ndërprerje të energjisë dhe tension të dobët, KEK sh.a. ka dalë me një sqarim publik, duke rikujtuar se nuk është përgjegjës për furnizimin me energji elektrike.
Sipas kompanisë, raportimi dhe titrat e kronikës televizive ia atribuonin problemet KEK-ut, ndërsa realiteti në terren tregon se kjo kompani nuk është përgjegjëse për rrjetin e shpërndarjes si dhe për furnizim me energji elektrike.
KEK sh.a. është vetëm prodhues energjie dhe nuk operon rrjetin e shpërndarjes, sipas licencave dhe kompetencave ligjore.
Komunikimi i këtij realiteti institucional është i rëndësishëm, thekson KEK, pasi keqinformimi i publikut mund të krijojë konfuzion mbi përgjegjësitë reale për furnizimin dhe cilësinë e energjisë elektrike.
‘Paraqitja e KEK sh.a. si përgjegjës për çështje që lidhen me furnizimin, cilësinë e dobët të tensionit apo ndërprerjet në rrjet përbën keqinformim të opinionit publik dhe bie ndesh me parimet themelore të gazetarisë profesionale, përfshirë saktësinë e informacionit, verifikimin e fakteve dhe ndarjen e qartë të përgjegjësive institucionale’, thuhet në reagimin e KEK.
Për këtë arsye, kompania paralajmëron se do të ndjekë rrugët ligjore për të siguruar që raportimi mediatik të jetë korrekt dhe i saktë.
Postimi i plotë
𝐊𝐮𝐫 𝐩𝐚𝐧𝐤𝐚𝐫𝐭𝐚𝐭 𝐟𝐥𝐚𝐬𝐢𝐧 𝐩ë𝐫 𝐊𝐄𝐃𝐒, 𝐩𝐨𝐫 𝐭𝐢𝐭𝐫𝐚𝐭 𝐟𝐚𝐣ë𝐬𝐨𝐣𝐧ë 𝐊𝐄𝐊-𝐮𝐧
Në pamjet nga protesta e transmetuar nga televizioni Klan Kosova, në edicionin qendror të lajmeve të orës 20:00, të datës 18.01.2026, realiteti në terren është i qartë dhe i dokumentuar vizualisht: qytetarët protestojnë kundër KEDS-it, kompanisë së licencuar për operimin e rrjetit të shpërndarjes dhe furnizimin me energji elektrike. Kjo dëshmohet qartë si nga pankartat e mbajtura nga protestuesit, ashtu edhe nga deklaratat e tyre publike, ku theksohen problemet me tensionin e dobët dhe ndërprerjet e vazhdueshme në rrjet.
Megjithatë, gjatë gjithë raportimit televiziv, si narrativi i lajmit ashtu edhe titrat, ia atribuojnë këto problematika KEK sh.a., duke krijuar një kundërthënie të qartë dhe flagrante ndërmjet asaj që paraqitet në pamje dhe asaj që komunikohet për publikun. Për më tepër, gjatë gjithë kronikës janë përdorur titra me përmbajtje: “Blloqet e KEK-ut – Ndreqet njëri e ndalet tjetri”, të cilat nuk përputhen me realitetin e paraqitur në pamje dhe me deklaratat e vetë qytetarëve.
Faktet janë të pakontestueshme dhe të bazuara në kompetenca ligjore dhe licenca përkatëse:
- KEK sh.a. nuk operon rrjetin e shpërndarjes;
- KEK sh.a. nuk është i licencuar për furnizimin e konsumatorëve të rregulluar;
- KEK sh.a. është prodhues i energjisë elektrike, në përputhje me licencën përkatëse.
Paraqitja e KEK sh.a. si përgjegjës për çështje që lidhen me furnizimin, cilësinë e dobët të tensionit apo ndërprerjet në rrjet përbën keqinformim të opinionit publik dhe bie ndesh me parimet themelore të gazetarisë profesionale, përfshirë saktësinë e informacionit, verifikimin e fakteve dhe ndarjen e qartë të përgjegjësive institucionale.
Kjo nuk është çështje interpretimi editorial, por çështje kompetencash ligjore të përcaktuara qartë me ligj dhe licenca.
Kur pankartat flasin për KEDS, ndërsa si narrativi i lajmit ashtu edhe titrat fajësojnë KEK-un, publiku nuk informohet – por çorientohet.
Për këtë arsye, KEK sh.a. paralajmëron parashtrimin e ankesës së menjëhershme pranë Komisionit të Pavarur të Mediave (KPM), me qëllim që, në përputhje me rregulloret dhe legjislacionin në fuqi, të ndërmerren masat e parapara dhe të sigurohet që raportimi mediatik të jetë:
- i saktë,
- i balancuar,
- dhe në përputhje me realitetin institucional dhe ligjor.
E vërteta nuk mund të redaktohet me titra.
