Sllovenia do të investojë rreth 174 milionë euro për modernizimin e rrjetit të saj elektrik, në kuadër të gjashtë projekteve që synojnë forcimin e infrastrukturës energjetike dhe përshpejtimin e integrimit të burimeve të ripërtëritshme.
Sipas Ministrisë së Mjedisit, Klimës dhe Energjisë të Sllovenisë, projektet do të kontribuojnë në rritjen e kapacitetit të rrjetit, përmirësimin e sigurisë së furnizimit me energji elektrike dhe integrimin më të shpejtë të energjisë së ripërtëritshme në sistem.
Financimi përfshin edhe rreth 59 milionë euro nga Fondi i Modernizimit i Bashkimit Evropian, i cili mbështet investimet në energji të pastër, efikasitet energjetik, magazinim të energjisë dhe modernizim të rrjeteve energjetike, përcjell Energy Monitor.
Fondet do të shkojnë për projekte të kompanive energjetike Elektro Ljubljana, Elektro Gorenjska, ELES, Elektro Celje, Elektro Maribor dhe Elektro Primorska. Projekti më i madh individual është ai i Elektro Ljubljana, që përfshin modernizimin e rrjetit të shpërndarjes në zonat urbane me një vlerë prej 53.2 milionë euro, nga të cilat rreth 19.6 milionë euro do të financohen përmes kësaj skeme.
Sllovenia ka në dispozicion më shumë se 300 milionë euro nga Fondi i Modernizimit deri në vitin 2030, të cilat planifikon t’i përdorë kryesisht për modernizimin e rrjeteve energjetike, rritjen e efikasitetit energjetik dhe integrimin e burimeve të ripërtëritshme.
Këto investime konsiderohen kyçe për përgatitjen e sistemit energjetik të vendit për një pjesëmarrje më të madhe të energjisë së pastër dhe për rritjen e qëndrueshmërisë së rrjetit në vitet në vijim.
